/p. 38/ apparent, ventorum sunt nuntiae; medius
namque aër, qui in sublimi est, dum vehementius
agitatur, siderum lumen dispergit ac proinde
[stellae] scintillare videntur magis. Alex. – Sed Aristoteles
scripsit ideo videri sidera tremere, quia visus
in coelum fertur. I. C. – Repugnat hoc suae ipsius
philosophiae decretis, in quibus omnino
negat visionem fieri per emissionem radiorum ex
oculis. Alex. – Ita esto. Sed, quaeso, perdocte Iuli
Caesar, fac per te erudiar, fac ut concipiam id
quod animum meum iamdudum sollicitat et
angit. I. C. – Quid istuc est?
DIALOGUS VIII.
De igne.
Alex. –
Insusurrasti mihi, si bene memini,
ignem non esse elementum.
Enarres, humillime te deprecor,
rationes, quibus dogma
hoc, iam per tot saecula a sapientissimis
viris stabilitum, impugnas. Si hoc
praestas, ut praestare potes,
eris mihi semper magnus
Apollo. I. C. – Non committam, ut plus potuisse
preces videantur, quam ius et amicitiae,
quae habet omnia communia et literarum necessitudo,
quae viris sapientibus ea de causa videntur
a Deo impertitae, ut quod ab eo gratis acceperimus,
optimo cuique reponamus non inviti.